Ликовна изложба на Дејан Марков во Кавадарци
01-11-2014 КУЛТУРА

Иако по вокација графичар Дејан Марков  по завршувањето на својата академска наобразба  во најголем дел од својот интерес  го реализира во  еден друг медиум-сликарство,  а синоќешната негова изложба во рамките на кавадаречката културна есен беше негово четврто самостојно претставување . Во своите  масла на платно  и медијапан  Дејан Марков креира  облици  од духовниот живот , ги дифузира старите антички етно и фолклорни елементи со еден современ израз. Неговиот творечки опус  е интимна интерпретација  со едно лирско и поетско –романтично доживување  во минатото кое допира и се проткајува  со мотиви од современоста , издвојувајќи  единство помеѓу  инспиративниот потик и уметничката визија .

 

Со изборот на топлата гама на земјените тонови кои се израз на преовладувачката носталгична емоција, авторот сугерира на предметите и амбиентот од минатото, кои се интерпретирани на современ начин.  Дејан Марков е трагач по непознатото во познатото создавајќи хармонија на фактичката реалност и фантазијата на умот – за неговата уметност ќе напишат Горан Ѓорѓиевски и Зоран Читкушев.  За  Томе Крстевски етнолог во Музеј-галеријата во Кавадарци  кој ја отвори изложбата , Дејан Марков во своите дела ја отсликува традиција , го доловува  амбиентот  и духовниот живот со богатство на етно елементи.

 

                Ликовниот уметник Дејан Марков  за КТВ открива дека изложените 29 дела се работени во периодот  од  2000 до 2014 година  и затоа е наречена „Време“. Содржи  етно мотиви, дел од историја , античкиот период  на Македонија и нашето после турско време и современиот период.  Во иднина тој продолжува  и понатаму да слика етно мотиви кои за него претставуваат непресушен извор.

Мирјана Мукаетова

 

 

Додади коментар