Не е постигнат договор меѓу визбите и лозарите за откупната цена
16-08-2019 РЕГИОН

Три часа разговараа но договор не постигнаа. Лозарите и винарите не отстапуваат од своите црвени линии. Доколку нема повисока цена на грозјето, производителите најавуваат радикални протести.

 

Вчера тие три часа разговараа во Кавадарци. На состанокот беше и министерот за земјоделство, Трајан Димковски, пратеникот Панчо Минов и градоначалникот Митко Јанчев.

 

Лозарите бараат визбите да ја променат поразителната политика, да го одврзат ќесето и за квалитетно грозје да дадат повисока цена. Задоволни се велат, од поддршката што ја добиваат од МЗШВ и од градоначалникот, но не било во ред само државата да дава за тоа што треба визбите да го платат.

 

„Договор не се постигна. Чекаме до понеделник да видиме што и како ќе биде. Ни се случува истата политика како и лани. Државата е спремна да ни помогне но ние не сме социјален случај па постојано да чекаме од државата. Винариите да си го одврзат ќесето и да си плаќаат по шеќерна единица. Тие предлагаат 21 малиган за 13 денари. Бараат квалитет. Им даваме квалитет. Проблем е тоа што тие не сакаат да го платат така како што треба“ вели претседателот на лозарското здружение „Напредни лозари“ од Кавадарци, Трајче Кулев.

 

Лозарите инсистираат најниска цена за најевтиното грозје да биде 20 денари за 16 шеќерни единици. Поставија црвени линии после кои нема да преговараат, а тоа е за 16 шеќерни единици цената да не падне под 16 денари за смедеревката и 17 за вранецот.

 

Доколку не бидат прифатени барањата на лозарите, тие најавуваат радикални протести се со цел да дојдат, како што велат до некоја реална и достоинствена цена за грозјето.


Ангел Данов

 

Додади коментар